某啲人類嘅需求好奇怪，亦因為咁衍生出一啲奇怪服務業，以下5個你地又有無興趣試？
1. 鼻毛匿名通報服務
有無試過見到朋友同事有鼻毛凸出嚟，但又唔好意思提佢？ Chololi網站就幫到你喇～
只要你填好「凸鼻毛同事」嘅名、email同條鼻毛嘅詳細資料，網站就會幫你匿名email俾佢，話佢知佢有條鼻毛凸咗出嚟，咁就可以唔洗自己開口講咁尷尬喇～網站有中文、英文同日文，快啲上去提下你朋友喇～
2. 綁架服務
雖然有啲變態，但大家有無幻想過自己俾人綁架？小編成日都幻想自己俾人綁架之後有個型男出嚟英雄救美，可惜呢個綁架唔包型男～法國一間叫Ultimate Reality嘅公司就提供綁架服務，仲講到明包埋毒打你，但價錢就要成1000美金，俾咁多錢仲要無型男相伴，小編都係早啲瞓發下夢算～
3. 做情色戀愛小說主角
大家都一定幻想過自己係劇集或者小說女主角，而家各位機會嚟喇！只要填上你理想情人嘅條件，同埋一啲你嘅喜好，YourNovel.com就會幫你寫一本情色戀愛小說，令你真真正正咁做返次女主角～
呢個服務索價50美金，有勁多唔同類型嘅小說可以選擇，無論你鐘意本地戀異地戀都無問題～
4. 骨灰煙花
大家有無諗過死咗啲骨灰要點做？海葬？用嚟種花？ 定係想變做煙花喺天空好燦爛咁消失呢？Heavenly Stars Fireworks可以將死者骨灰打上天空變成燦爛嘅煙花，但價錢就一啲都唔平，要3999英鎊，所以話呢～死之前記住儲定多啲錢喇～
5. 宿醉治療
飲醉唔一定要瞓街嘅！拉斯維加斯嘅Hangover Heaven提供宿醉治療嘅行動巴士服務，喺入面會幫你吊鹽水補充水分，就算你醉到不省人事都好，科羅拉多州內都會提供治療宿醉嘅到府服務，幫你煮早餐同清理前一晚狂歡留低嘅凌亂，可惜香港未有呢個服務，如果唔係應該好多人都有需要～
以上咁多樣奇怪服務你地最想試邊種？你地又有無其他奇怪需要呢？
圖片來源：網上
撰者：Kinnie
