日本品牌無印良品(Muji)一向走簡約實用路線,力sell其「日系生活態度」。除咗賣家品雜貨,近年無印良品不停開拓新業務,例如「Café & Meal MUJI」、「MUJI BOOKS」、酒店等等外,最近更開咗首間蔬果賣場!
香港人相當喜愛嘅無印良品首間蔬果賣場於7月28號已經喺東京有樂町旗艦店開幕!賣場最大賣點係店內蔬果都係以產地直銷嘅方式售賣,生產者、生產團體以冇添加化學合成農藥、化學肥料或減低農藥量栽培嘅蔬果為主。
商品旁會標示生產者嘅想法以及建議食用方式,官方表示開設蔬果賣場嘅目的係希望客人能夠從生產者以及生產現場,重新審視食物同人類關係。
賣場總共有超過300種貨品,除咗時令蔬果,更有不少調味料。相信可以吸引一眾熱愛素食嘅朋友前往朝聖!
旗艦店另一賣點就係呢個「無印良品小屋」嘅實際模型。
2樓為「Café & Meal MUJI」,提供新鮮剛出爐麵包、咖啡及首次發售嘅手工蔬菜湯。
【Info】
無印良品 有樂町
地址:東京都千代田區丸之內3-8-3 Infos有楽町1〜3F
營業時間:10:00〜21:00
圖片來源:Muji.com
撰文:Amber