大家去日本旅行都不免會行下啲神社，但你地又知唔知邊個神社最催谷到你嘅愛情運呢～
1. 出雲大社
位於島根縣嘅出雲大社係全日本最靈驗嘅戀愛神社，每年有六百萬人去參拜求返個好姻緣架！雖然位置比較偏僻，要長途跋涉先去到，但就係要難求先會珍惜架嘛～如果真係抽唔到時間去咁遠，出雲大社喺東京六本木都設有分祠，靈驗程度小編就唔知喇～
交通： JR「出雲市」搭乘一畑巴士-大社線在「正門前」下車，車程約22分鐘。
2. 川越冰川神社
冰川神社係一間已經有1500年歷史嘅神社，祭祀住夫婦神，好多人都會去求婚姻同家庭圓滿架～神社每朝8點仲會免費派發限量20個姻緣石，呢啲姻緣石非賣品嚟架～仲要經過巫女加持祈求，拎到返屋企一定一家樂也融融啊～
交通：搭乘西武新宿線（本川越站）東武巴士5號「宮下町」下車 / 東武東上線（川越站）東武巴士7號「宮下町」下車
3. 地主神社
地主神社主祀戀愛之神，神社入面有對「戀愛占卜石」，彼此相距10米，相傳如果可以閉眼由一邊嘅石頭走到另一邊，兩人嘅戀愛就會如願以償，大家去神社嗰陣記住試下喇～每個月第一個星期日下午2點，神社仲會舉辦「緣結地主祭」嘅活動，參加者有機會免費獲得戀愛開運槌或飾品，有興趣嘅朋友記住mark定落schedule喇～
交通：JR「京都」站轉搭市營公車100或206號約12分鍾，在「五條坂」站下車，徒歩約15分鍾即可抵達。
4. 相傳貴船神社唔止幫到你戀愛運，仲可以令你一生幸福，所以每年都有好多信眾去參拜。而貴船神社最出名就係佢嘅水占卜，只要將占卜籤放入本宮側邊嘅山泉水池，籤詩文字就會漸漸浮出架喇～
交通：JR「京都」站搭乘烏丸線至「國際會館」站，轉搭京都巴士52至貴船口，再轉搭京都巴士33至「貴船」，徒步5分抵達貴船神社。
5. 東京大神宮
東京大神宮係神前結婚式嘅發源地，仲合祭咗掌管男女姻緣嘅「造化三神」同傳聞係絕世美女嘅皇女「倭比賣命」，所以好多女仔都會嚟求姻緣同美貌架～如果想嚟緊一年都有戀愛之神庇佑，記住臨走買返個御守喇～
交通：從JR總務線、東京Metro地鐵東西線等的「飯田橋」站步行約5分鐘
好多嘢都信則有不信則無，就算唔信都可以去行個圈，可能會遇到你嘅心儀女仔呢～
圖片來源：網上
撰者：Kinnie
