無論平定貴，DW又好，勞力士又好，總之係手錶廣告，9成9都會將時間較到係十點十分左右，甚至係十點十分三十一秒。唔講可能你唔會發現，但一講你上網search下就知呢個可以話係手錶廣告嘅法則定律。究竟係點解要咁做﹖又點解要係十點十分﹖
其實較喺十點十分最主要有三個原因︰
一︰視覺上嘅美感
十點十分嘅時針分針擺法，時針同分針就冇重疊到，對於展示手錶設計，例如顏色、錶盤，材質都係最好嘅擺法，帶俾受眾最好嘅欣賞視覺。當然，有好多擺法都唔會令時針分針重疊，點解偏偏要係十點十分﹖其中一個因素係十點十分將錶面分割成上下1:2嘅黃金分割比例，視覺上美感好啲。另外就關之後嘅因素事。
二︰捉住顧客心理
將時間較喺，指針同分針就會呈向上飛嘅「V」字形象，指針同分針同時向上揚，除左靚之外，心理上睇落去會令受眾心情興奮，增加佢地嘅購買慾，所以手錶廣告都鐘意將時間較喺十點十分。
三︰顯示最多資料
有戴開手錶嘅朋友都知大部分手錶錶面設計雖然唔同，但係品牌logo通常會放喺12點位下面，而6點位上面就會放一啲其他資訊，例如「17 jewel 」 「automatic」「 Incabloc 」，由於字母較長，所以5點位到7點位都會被佔。十點十分呢個擺法除左指針分針唔會重疊之外，仲唔會疊住其他錶廠想顯示嘅資訊。
大家下次睇手錶廣告不妨留意下。
撰文: JJ Wong
