【文青】個性花草紋身貼紙 怕痛人士必備

近年紋身潮流愈趨簡約,小清新風格嘅小花葉、韓式幾何圖形紋身都相當受女性歡迎,美國有紋身貼紙品牌早前同法國藝術家Vincent Jeannerot合作,將佢嘅花草水彩作品轉化成香味紋身貼紙,文青們絕對唔可以錯過!

近期紋身熱潮再度掀起,令到好多人都心思思想紋返個,不過想紋身又怕痛又驚自己後悔?紋身貼紙就係最好選擇!紋身貼紙再唔係小朋友嘅玩意,根據Pinterest 嘅報告,紋身貼紙已經重回潮流,而大眾對香味紋身嘅興趣更不斷上升!

美國紋身貼紙品牌Tattly 會同不同嘅設計師合作,推出不同系列嘅紋身貼紙。而早前同法國藝術家合作嘅系列就相當適合一眾文青喇!Vincent Jeannerot 一向出名畫植物水彩畫,今次佢就同 Tattly合作,將佢畫嘅花草水彩香草、迷迭香、百里香等草本植物轉化成香味紋身貼紙。紋身貼紙係由植物性顏料製成,更會發出淡淡植物香味!貼上後可以維持2-3天,亦唔會引致敏感,小朋友都可以貼!

Tattly 創辦人Tina Roth Eisenberg表示開始研究紋身貼紙係因為接受唔到囡囡手上粗糙又冇質感嘅紋身貼紙,所以決心要創造出具有設計感又高質紋身貼紙。

Tattly 推出嘅紋身貼紙特別又時尚,暫時有15種味道嘅香味,除咗植物系列有香味外,更加有糖果味,大人小朋友都啱玩啊!

圖片來源:Instagram @ tattly

撰文:Amber

DMC Firewall is developed by Dean Marshall Consultancy Ltd