相信《孖寶兄弟》（Super Mario Bros）遊戲陪伴住好多人成長，可能好多人而家仲有玩緊添！而今個冬天，一直帶領東京時尚彩妝潮流植村秀Shu Uemura 將大家嘅童年回憶融入到產品當中，同《孖寶兄弟》推出一系列聯乘產品，大家準備好未？
Shu Uemura 經常與不同品牌合作，玩出彩妝品嘅全新變化，而今次就選擇任天堂合作，超驚喜啊！今次係任天堂首次同彩妝品牌合作，整個系列產品相當多元化，兼顧清潔、保養與彩妝。除咗有彩妝用品、護膚品外，同時會推出美髮用品，包括，洗頭水、護髮素、頭髮造型產品等等。
而Shu Uemura 今年嘅假期限量系列選擇同《孖寶兄弟》合作，係因為品牌唔單只想大家創造妝容，更希望大家可以「玩出」適合自己嘅獨特造型，並希望借呢個系列讓顧客可以好好享受假期。Shu Uemura 嘅國際彩妝總監打出角康呂（Kakuyasu Uchiide）更表示，今次係Shu Uemura 首次從「城市」中取得創作靈感，而今次嘅靈感好明顥就係來自日本啦！
▼產品上印有出自《孖寶兄弟》嘅像素風格元素，经典而富有魅力。化妝盒印上馬里奧以及碧琪公主，相當特別！
▼ 呢個充滿玩味嘅系列最特別就係呢枝名為“Dual Stamp-Me Liner”嘅眼線筆，一邊頭係星星形印章，化妝之餘又可以拎嚟玩！
▼ 限量版眼影及胭脂彩妝盒糅合六種眼影顏色及兩種胭脂顏色，讓大家「玩出」最適合自己嘅創意眼妝！
Shu Uemura x 孖寶兄弟呢個系列將會於11月1號全球同步發售，大家只好再等下啦！
圖片來源：refinery29
撰文：Amber
