| {youtube}HfD982HfgHc{/youtube} |
1993年出生嘅梁洛熙自小喜愛藝術，但成績未如理想，喺大專期間只能選擇室內設計系。同其他同學一樣，畢業後投身室內設計行業，成為一般嘅上班族，返工OT放工。但工作始終係工作，同佢熱衷嘅藝術創作係大相径庭之事。半年前，Giraffe毅然辭職，決定全身投入自己熱愛嘅藝術夢。
事實拼搏VS追尋夢想
起初，雖然梁父願意借出郊區倉庫比梁做創作，但家人並唔係個個都支持佢嘅決定，媽媽認為應該為事業拼搏。但係，Giraffe對年輕就有另一個睇法。對於Giraffe黎講，人生只有一次，追夢就需要「趁後生，唔通老左先追咩」。佢寧願後悔失敗，都不甘心冇踏出呢一步。
落葉與香港
Giraffe現時嘅作品主要以樹葉作畫，用番梘水煲白蘭樹葉，再擦走葉肉，將一片一片樹葉拼貼成畫。一幅畫所用嘅樹葉多達三四百片，當中仲未計算製作失敗嘅樹葉。採訪當日小編亦有落手嘗試，看似簡單嘅樹葉畫，其實一啲都唔輕鬆。點解要以樹葉作畫？Giraffe指落葉好似係被淘汰，唔被需要嘅野，但事實上佢哋仍然有佢嘅用處同靚嘅地方。
Giraffe平日鍾意係香港各處寫生，佢係寫生當中能夠觀察到平日未有注意嘅城市細節同都市人情。佢嘅作品現時主題大多以舊香港為題，Giraffe指出咁係因為佢比較嚮往昔日比較多樣化嘅香港，只要你肯努力加上有才能，係唔同方面都會有你發展空間。反觀今日香港變得經濟主導，利字當頭，發展空間好少，特別係經濟效益較少嘅事物，藝術創作正正係其中之一。
▲Giraffe 作品︰左為舊啟德面貌，右為自由神像
講到底，並唔係人人都有Giraffe果種勇氣，要係香港決定追夢絕對唔係容易之事。Giraffe自己都同意現實嘅香港未必容得下一個有夢想嘅人。但Giraffe同時指出，如果你有夢想，你唔需要理會係唔係香港，你只需要俾自己一個機會。
Giraffe嘅原動力
採訪當日一入Giraffe嘅創作空間，音樂即刻傳入耳中:「驚無人like 驚會蝕底最後成世困喺井底」。原來電腦播緊TONICK嘅《發你個夢》。Giraffe解釋自己創作時都會播TONICK 嘅playlist，歌曲都好正面，係佢推動自己嘅原動力喎。正好我都係TONICK嘅fans，呢度同video就以TONICK的歌詞收尾﹗
「唔信個個要一樣嘅樣
唔信個世界得一個方向
唔驚出軌誇張
唔希罕攞咩獎
唔簡單普通自然唔一樣
就算個個笑我荒謬空想
就即管欣賞這個異相
就算一隻手拍掌
就算得我這模樣
我要發嘅夢仍然一樣
獨一的異相」
採訪︰JJ & Yanica
拍攝︰JJ & 林駿康
剪接︰JJ
撰文︰JJ
