巨大禿鷹展翅 仿納斯卡線稻田藝術

日本埼玉縣行田市小針一年一度嘅「稻田藝術」又迎來觀賞嘅時期,今年嘅主題喺「巨大羽翼與納斯卡線」。由旁邊嘅公園「古代蓮之里」入面嘅古代蓮會館展望室(約50米高),可以一次過望晒展翅中嘅巨大禿鷹同納斯卡線。雖然有一部分稻米因為今年大暑而枯萎,但稻農都有一直補植正常嘅稻米。直至8月尾都可以睇倒震撼嘅稻田藝術,好值得特登去現場睇一次。

稻田藝術已經喺第十一年,2015年被健力士世界紀錄認定為世界最大。今年用咗約2.8公頃嘅稻田,稻米共有8種類嘅顏色組成。今年更加挑戰加入立體嘅元素,令稻田畫更加真實。

由稻米組成的展翅中巨大禿鷹與納斯卡線

而行田市旁邊嘅熊谷市今年7月23日被觀測出日本觀測史上最熱嘅41.1度,對於炎熱天氣耐性較低嘅橙色同黃色會較易枯萎。禿鷹嘅頭、喙同古代蓮花瓣嘅部分因為咁令種稻米嘅水面露出,幸好仍然有額外嘅稻米可以補上,令畫作完整。

天氣雖然喺咁熱,但喺古代蓮會館展望室有冷氣,大家都可以喺果度舒服咁觀賞。館內為咗配合今次稻田藝術嘅主題,仲會舉行展示有關納斯卡線同秘魯嘅活動,例如8月19日會有秘魯音樂會。呢個地點又會唔會喺你去日本旅行嘅選擇呢?

撰文:Oliver Fong

DMC Firewall is developed by Dean Marshall Consultancy Ltd