可樂大家就飲得多,有無諗過可樂同咖啡溝埋一齊呢?日本可口可樂公司將會喺9月17日推出「Coca Cola plus coffee」。
「Coca Cola plus coffee」會保留可樂嘅味道同炭酸嘅口感,再額外加上咖啡嘅香味平衡。一飲落口先會品嘗到可樂嘅甜味,隨之而來就喺濃厚嘅咖啡甘苦味殘留喺口中。加上咖啡因加倍,飲完之後一定醒神。無晒精神或者做嘢做到好攰嘅人,要打醒精神一定啱飲。
「Coca Cola plus coffee」對象喺比人「返緊工」嘅時候飲,可以喺做緊嘢或者中途休息嘅轉換吓心情。據消費者調查報告指出,35歲以上嘅人飲得最多炭酸飲料就喺「返緊工」嘅時候。而咖啡啱啱好都喺差唔多咁嘅結果,每週會飲一次咖啡嘅人有4成都會飲差唔多次數嘅炭酸飲料。可以見到嚟到35歲呢個年齡層,咖啡同炭酸飲料都喺佢地鐘意飲嘅飲品,兩者撈埋一齊睇嚟就可以滿足晒大家嘅兩個願望。
其實2017年9月嘅時候都有推出過「Coca Cola coffee plus」,當時只喺關東、東北、南東北嘅自動售賣機有售,所以都算喺幾稀有嘅特別版可樂。今次推出嘅範圍更加會推廣至全日本,不單止會喺自動售賣機,更加會喺便利店度可以搵到。
撰文:Oliver Fong