由空知英秋初次連載的漫畫「銀魂」，除咗能夠動畫化之外，近年亦都真人電影化。但一切令人感到佢終於成為《Jump》一哥嘅時候，今期發售嘅Jump竟然宣布銀魂仲有5話就會完結。
2003年12月8日開始連載至今已經15年嘅銀魂，以架空嘅江戶作為舞台，喺被稱作「天人」嘅異星人支配嘅世界，圍繞萬事屋搞笑同認真交錯嘅故事。以坂田銀時作為中心點，加上神八、神樂等角色，描述喺呢個世界所發生嘅事件，再配上幽默方式吐糟。
漫畫嘅單行本第一卷2004年4月2日發售，直至72卷累計發行超過5500萬部。2006年4月電視動畫開始播放，11年4月至12年3月播放第二期，15年4月至16年3月播放第三期，18年1月開始播放第4期。
而由演員小栗旬主演嘅真人版電影喺17年公開，票房收入達38億円。續篇嘅銀魂2電影，今個月17日都已經喺日本公開。
作者空知英秋02年就已經喺「週刊少年Jump」嘅「第71回天下一漫畫賞」中，靠漫畫「Dandelion」取得佳作成績，隨後03年亦都推出過漫畫「白黑」。直至04年嘅初次連載作品「銀魂」，先至一炮而紅。
今期嘅「週刊少年Jump」以坂田銀時嘅漫畫版、動畫版、電影版造型作為封面。除咗用嚟紀念電影版嘅公開，仲直接講到距離「銀魂」漫畫最終回只剩5話。
網絡上知道銀魂完結，都有唔少悲嗚嘅聲音。亦都有人開玩笑講「銀魂嘅完結，喺咪姐喺金魂嘅開始？」，連漫畫嘅完結都可以比人當做笑話嚟講，睇嚟都係銀魂先做得到。
撰文：Oliver Fong
