而家成日都聽到小朋友細細個就要上唔同嘅興趣班，咩快樂童年都無晒，上海就正正有個怪獸家長係咁，仲令到小朋友2歲就有脫髮問題。
根據大陸武漢晚報報導，上海有個2歲男童東東，佢媽媽近兩個月發現東東每朝起身個枕頭都有好多頭髮，而且成日半夜發惡夢嚇醒，於是就同佢睇醫生。
醫生檢查完發現東東患上「班禿」，呢個病係因為壓力過大所致。但係一個2歲男仔又會有咩壓力呢？原來佢媽媽為咗令東東入到好嘅幼稚園，而逼佢上5個興趣同補習班，分別係數學、英文、畫畫、鋼琴同口才。
而且每次當東東唔想再讀嗰陣，佢媽媽都會好惡咁同佢講一定要考到，令到東東壓力太大。
唔少網友聽完都話可唔可以俾返個快樂童年東東，其實唔止東東，而家香港都有好多怪獸家長，希望佢哋都可以快啲醒覺喇～
資料來源：新浪新聞中心，World of Buzz
撰者:Kinnie
