澳洲昆士蘭一個34歲爸爸Nathan Perry證明咗父愛真係好偉大。有一日半夜佢瞓瞓下驚醒，發現屋企充滿濃煙，佢兩個仔間房著火，於是就即刻諗都唔諗衝入去救佢哋，仲搞到自己嚴重燒傷。
©9News
Perry救咗兩個仔之後就被送到醫院搶救，佢雙手雙腳同塊面都燒傷。而且上天亦無憐憫佢哋，Perry好快就要作出一個好困難嘅決定，就係要關閉4歲仔仔嘅呼吸器，令佢唔洗再受苦。
©Facebook
佢哋3歲嘅仔身體有90%燒傷，而家仲喺醫院留醫，起火原因警方仲調查緊。
©Facebook
Perry話呢次係佢生命中最可怕嘅事，佢從來無諗過自己會經歷呢啲苦痛。佢老婆Tamika Frid亦都話好希望一切只係一場夢，第二日瞓醒仲可以好似以前咁，一家四口開開心心咁食飯同玩，可惜以後都再無呢個機會。
©9News
Frid最後亦都講，大家平時應該盡量抽時間陪多啲屋企人，因為你永遠唔會知道佢哋幾時離開你。
圖片及資金來源：UNILAD，INDEPENDENT
撰者：Kinnie
