泰國全年夏天，所以當地人都好鐘意食冰，甚至係各式各樣嘅消暑甜品！佢地每間甜品店都各出奇謀，務求吸引大家一齊「相機食先」！
1. 巨型士多啤梨Parfait – Mo & Moshi
係喇你無睇錯！就係呢個一杯裝滿22球雪糕嘅超級巨型芭菲，叫Strawberry Special！小編目測入面起碼有三盒百力滋、無限窩夫、超多mousse同埋超多cream！
佢嘅份量足足同一個小朋友差唔多～所以絕對唔係比你一個人食晒佢架～係同朋友開心share嘅好東西！
嫌士多啤梨呢款太粉紅太夢幻嘅話，不妨選擇呢款放滿天神送比大家嘅金莎朱古力，仲有超多香蕉！
其實仲有好多種口味架，不過價錢就唔太親民，要3000泰銖一杯，即係大約港幣七百幾蚊～
不過用嚟呃like加埋同朋友一齊些牙果種開心又真係無得彈嘅！而家呢個巨型芭菲喺泰國超紅，就連泰國通胡慧沖都有介紹過架！
| {youtube}PeaH5LAPZsI{/youtube} |
地址：979 Siam Center , 4th floor, Rama1 Road Prathumwan, Bangkok 10330
2. 棉花糖呃LIKE特飲 – Once Café
呢間cafe唔係咩大型連鎖店，店子小小但係呢杯特飲就超吸睛喇！
呢杯係店家熱賣之作- Once Explosion，小編諗應該係用棉花糖模仿爆炸時升起嘅果堆煙雲～
最好就係佢仲有好多款比大家選擇，唔同味道就會配合唔同嘅棉花糖！
呢間cafe仲有另一款甜品值得推介，佢叫Egglettle Tower，係用大家食開嘅雞蛋仔配合雪糕整成的～一大座山咁好震撼！
地址：228/, Siam Square Soi 2, Pathum Wan, Bangkok
3. 甜品都可以係素食 – Veganerie
呢間餐廳主打素食，你可能會諗甜品點樣素食呢？其實就係用嘅食材全部都係純植物基，無膽固醇，而且百份百無任何奶類乳製品同埋蛋，咁就係100%嘅素食甜品喇。
雖然無蛋無奶，但係一樣可以做出好有質素嘅waffle，甚至雪糕，佢地喺泰國好受當地人同旅客歡迎！食素嘅朋友一定要試！
地址：SIAM PARAGON MALL, Bangkok, Thailand
4. 日系彩虹刨冰 - Maygori
呢間餐廳主打日系刨冰，最受歡迎嘅絕對係以下呢款彩虹刨冰～
唔好以為佢咁多糖漿又有醬會好甜，其實上面嘅醬係芝士醬嚟架，係咪估佢唔到呢？刨冰入面仲有啫喱！對於全年夏天嘅泰國嚟講，真係消暑極品啊！
而且成間舖由內到外都係走日式風格，真係隨時以為自己去咗日本～
地址：2/F Siam Square One
5. 菠蘿，全部都係菠蘿！ - Homsuwan Pina Pina by Tipco
呢間由大型果汁製造商為紀念開業40週年而開設嘅甜品店，專賣由泰國本土出產嘅菠蘿製成嘅甜品，全泰國只此一家之餘，每款甜品都可能係世上唯一！
呢碗其實係冰凍菠蘿茶，有龍眼肉配搭菠蘿肉，冰冰涼涼入落去超開胃！
另外仲有一樣咁受歡迎嘅菠蘿冰，有咩特別？就係佢嘅冰係韓國好受歡迎果種刨冰，刨到好似雪咁嘅質感，入口綿滑即溶，同日式刨冰係完全兩種感覺！
而且用嘅菠蘿品種 Homsuwan 係泰國獨有，同淋喺上面嘅椰汁係絕配啊！
地址：G floor , The Gourmet Garden Zone, Siam Paragon , Bangkok
話說小編介紹完咁多款泰國甜品之後，都好想即刻飛返轉泰國食到夠啊！！！！
圖片來源：泰友營、小約翰@Thailand、Instagram、Facebook
撰文: Msrachel
