雖然香港只係一個好細嘅地方，但就有好多世界之最：全球最多摩天大樓、最長戶外電動行人電梯、全球建造價最貴嘅高速鐵路路段等等，除咗呢啲小學生都知嘅世界之最外，今日再介紹多啲比較少人知嘅香港世界之最俾大家啦～
1. 最長月台幕門
真係唔講唔知，原來港鐵尖東站係全世界最長嘅月台幕門，全長300米，唔怪得每次要行咁耐先行到車頭位置等候啦～
2. 最長彩色電視顯示屏
邊個會諗到，原來全世界最長嘅彩色電視顯示屏就坐落喺沙田馬場入面，長70.4米，高8米，方便所有觀眾都睇到賽事進行。睇黎下次入馬場除咗要睇馬之外，仲要好好睇下呢個最長彩色電視顯示屏。
3. 最長電影系列
全世界最長嘅電影系列係咩？Star War？狂野時速？Harry Potter？通通都唔係～答案就係黃飛鴻電影系列呀！總共有成103集架～一日睇一集都要睇半年先睇完，睇嚟呢個紀錄都無咩可能被打破。
4. 最大酒店壁畫
全世界最大酒店壁畫就係港島香格里拉酒店一幅叫做《大好河山》嘅巨型中國山水壁畫，高16層樓共50米，闊15.24米。住客通常都會一路搭升降機一路欣賞呢幅壁畫，咁搭升降機個陣無咁悶呀嘛～
5. 人口密度最高地區
呢個真係不意外，旺角係全世界人口密度最高地區，平均密度係每平方公里13萬人 。每次出旺角都好似打rugby咁左閃右避撞嚟撞去，真係少啲體力都去唔到目的地！
6. 全世界最高讀報率
呢個真係估你唔到～原來香港人每日平均每1,000人便閱讀咗800份報紙，我而家先知香港人係咁關心時事...
下次外國人問你香港有咩特別嘅時候，記住介紹返呢啲世界之最俾佢地知啦～
圖片來源：網上
撰者 : Kinnie
